- I dag skal me signere avtaler som i tillegg til å gje eit konstruktivt samarbeid mellom fylkeskommunen og kulturen, også sikrar økonomisk støtte til dykk 31 ulike kulturaktørar i Telemark dei neste tre åra. Dette blir eit samarbeid som gjev oss sjansen til å jobbe meir langsiktig og meir systematisk med å utvikle kulturfeltet i Telemark, sa fylkesordførar Svein Tore Løkslid i si tale til dei 31 kulturaktørane som signerte 3-årig avtale med Telemark fylkeskommune denne veka.
- Vårt ynskje er at samarbeidet skal gje dykk endå større moglegheit til å skape, utfordre og formidle, til glede for både telemarkingar og andre. Det er derfor med begeistring at eg signerer samarbeidsavtalene på vegner av Telemark fylkeskommune, la han til.
Utvide, forvalte og samarbeide
- Vi skal jobbe vidare med planane våre, vi ynskjer å utvide, men også forvalte det vi er i gang med. Vi har veldig mange samarbeidsaktørar i dag, men kjem til å jobbe med å få endå fleire, fortel Elisabeth deLunde frå Villa Lunde i Lunde. Ho er ein av heiltårsaktørane som har fått støtte.
Blant gjestene var Hilde Alice Vågslid leiar hovudutval for reisliv, kultur og frivilligheit, utvalet som vald ut samarbeidspartnarane for dei neste tre åra. - Det er moro å sjå og treffe det store mangfaldet av kultur-samarbeidspartnarane våre, sa ho.
Les også: Kultur-ja til 31 samarbeidsavtaler - Telemark fylkeskommune
Fire ulike grupper
Avtalene blei inngått med aktørar innan fire ulike søknadsgrupper. Ein av dei som signerte avtale innan profesjonelle kunstnarar, kulturutøvarar og ensemble, var musikar Kjetil Flatland frå Seljord. Han sette tonar til signeringseremonien som gjekk føre seg i resepsjonen i Telemarkshuset i Skien.
I tillegg til Kjetil Flatland Musikk, var det seks til i gruppa profesjonelle kunstnarar, kulturutøvarar og ensemble. Det blei også signert avtaler med ni festivalar og heilårsarrangørar, 11 frivillige organisasjonar og fire kompetansesenter. Dei blei alle ropt fram av fylkeskultursjef Maja Foss Five, før dei blei sendt vidare til signering med fylkesordførar Løkslid.
Glede i kulturbransjen
Kjersti Ulrichsen signerte avtala på vegner av Skeivt historielag.
- Det er fint at politikarane ser arbeidet me gjer, nå har dei vore vakne, meinte ho.
På kanten filosofifestival får også betre vilkår dei neste tre åra, så Kirsten Tangen var glad for å sette signaturen på avtalebrevet.
Bidreg til mangfald
- Felles for dykk alle, er at de bidreg til det mangfaldige og levande kulturlivet som kjenneteiknar fylket vårt. Me veit at mangfald av kulturaktivitetar og kulturopplevingar gjev eit fylke der folk har lyst til å bu og leve liva sine, og eit fylke som folk vil besøke. Derfor er det så viktig at me som fylkeskommune legg til rette med det me kan, og der me har moglegheit, fylkesordføraren.