- Desse midlane hjelper oss med å utvikle toppidrettutøvarar. Me skal skape gode utviklingstilbod, toppidrettskultur og prestasjonskultur, seier Eirik Hansen, regionleiar for Olympiatoppen Østlandet.
Saman med kollega Suzanna Tangen kom han til Telemarkshuset måndag for å signere kontrakt med fylkesordførar Sven Tore Løkslid.
Einarar og breidde
- Me treng Olympiatoppen. Dei jobbar med å få utøvarar til toppen, for me treng einarane - men denne satsinga er også eit godt bdra til folkehelsa. Gode forbilde stimulerer dei unge i breddeidretten, meiner Løkslid.
- Denne avtala er eg både glad for og stolt av, legg han til.
Avtala fortel at samarbeidet skal gje alle like moglegheiter, barrier skal byggast ned og parautøvarar skal få like sjansar som funksjonsfriske utøvarar.
«Denne satsinga er også eit godt bidrag til folkehelsa»
- Sven Tore Løkslid
Sikre kvalitet for alle
- Me jobbar med å sikre dagleg treningskvalitet for alle, slik Suzanna gjer for parautøvarane, fortel Hanssen.
Suzanna Tangen er sjølv parautøver innan sykling, og siktar mot OL i Los Angeles i 2028. Ho er også tilsett som fagkonsulent for paraidrett i Olympiatoppen Østlandet.
- Du bidreg med viktig kompetanse inn i paraidretten i organisasjonen vår, skryt Hanssen. Dei to utgjer ein stab på kring ti personar i Olympiatoppen Østlandet for Telemark og Vestfold. Dei er lokalisert i Idrettens hus i Porsgrunn, men Olympiatoppen Østlandet inkluderer også Østfold, Akershus og Buskerud.
Oppdraget er å få fram toppidrettsutøvarar, trenarar og kompetansemiljø.